أراسلك للكاتب الجزائري أيمن حولي

 

أراسلك للكاتب الجزائري أيمن حولي

أُراسِلك..

حتَى أخبرك أننّي..

حبِيت نحبّك.. بصح نخَاف !

كي كنتُ صغِير..

عندِي ما جرِيت حفيَان..

مَا خُفت زجَاج ولا مسَامِير..

وكي الكُرة في البيت المهجُور تتبحر/تتودر.. 

دخلت.. وما خُفت لا جنُون ولا جُرذان 

ولا صرَاصِير.. 

فِي كل مَوقف أو مِنصة أقِف.. 

نهدَر ونعَبر فرحَان.. 

ما خُفت حضُور ولا جمَاهِير.. 

كُل فَجر ما نُرقد.. 

نباتَ سهرَان..

وما خُفت الوِحدة ولا ظَلمة اللّيل.. 

بصح باش نحبّك.. نخَاف ! 

كيمَا نخَاف.. 

السَفر بعد معَاصي.. 

في الطَريق يوقفني عزرَائِيل.. 

كيما نخَاف.. 

بعدما نتعب ونقاصَي.. 

شِي ما ندِير.. 

كيما نخَاف.. نحبّك.. 

ونتمَلكك ونخنقك.. 

بعدما عليك نغِير.. 

نخاف نحبّك.. 

نخاف يجمعنا حرَام.. وما تحبنا الأقدَار.. 

نخَاف يجمعنا شِيطان فِي سرير.. ومَا يربطنا إِمَام.. 

نخَاف حلاوة الأيَام.. 

ترجع ذِكريات تبكِيك وتسهَرني ليال.. 

وش فَايدة ندِي قلبك برك.. وماندِيك معايا للدار؟

في القلب غصّة.. وفي البَال مئة قصة.. 

نخاف نحبّك.. ميش ع خَاطر أنتِ نَاقصة.. 

نخاف نزِيدك في حياتي.. ومع الأَيام.. 

 تبقاي مجرد ذِكرى في كارطونة قَابسة.. 

نخاف نحبّك.. 

لأن إذا حبِيتك حبتِيني.. باش نكملوا وش الضمَان؟ 

وصحيح ما يُقال.. 

لي ما يخاطر في الحُب.. وتزوجه أمه يعتبر جَبان.. 

ولي خاطر وخسر؟

 يبقى يخَاطر ولا يبقى يَخسر؟ 

خفت نحبّك ونتحَسر.. 

كيما خُفت..

على شحَال من شمعة حتى ما تطفَى..

بيها حرقُوني.. والقلب تكوَى..

وأنا لي لَونت..

قداه من زَهرة..

سرقها لي عندو الزهر.. واختفَى

والحمَام..

لي عزف لحن الحُزن..

عطيتو كتفي غُصن..

كبر وهجر.. ونسَى.. 

بصح حاب نحبّك.. 

ونغرق بين عينيك بشدّة.. 

نغرق وما نطلب النَجدة.. 

حاب نحبّك.. ونخاف ما تكوني واجدة.. 

حبي قد ما هو كبير وحنِين.. هو صعِيب.. 

ولي احتواه.. منو ما نجَى.. 

ويااا درَى.. 

إذا يتنحَى الخُوف.. نحبّك ونغامر.. 

يا تبنِي وش تكسَر.. 

يا نزيد نخسَر.. 

ولي عمرُو ما ربح.. وش خسَر..